Category Archives: A.C. Ponte Vella

Resumo Asemblea Xeral e Orola de Inverno.

O sábado 5 de Maio celebrouse a asemblea Xeral Ordinaria da A.C.R. Ponte Vella no local social de  Sorribos e aproveitando a ocasión inaugurouse a nova exposición fotográfica que estará exposta durante todo o verán. O gañador do concurso fotográfico foi Joaquín Fabeiro, e a súa fotografía pódese ver tanto en Sorribos como no Album web de picasa . Como ocorre sempre nestes casos a asemblea tivo que celebrarse en segunda convocatoria, xa que na hora que estaba sinalada (20:00 horas) non había quorum suficiente. Debido a que en segunda había únicamente tres ou catro socios vémonos obrigados a utilizar este espazo para informar aos veciños e socios do traballo que se fixo ao longo do ano e sobre todo facer público o estado de contas da asociación, ademáis de convocar eleccións á Xunta Directiva da Asociación xa que actual leva traballando os catro anos reglamentarios. Abreuse polo tanto o período electoral no que xa se poden presentar as candidaturas para dirixir os vindeiros catro anos a Asociación. Todos aqueles que se queiran presentar a estas eleccións deben cominicarllo a calquera membro da directiva saínte, tendo de prazo ata o día 7 de Xullo, día que se celebrarán as eleccións. No caso de non presentarse ningunha candidatura os membros da directiva saínte presentarán unha Xunta Directiva con un reparto de cargos distinto do actual. Dende aquí queremos animar a tódolos veciños que queiran colaborar coa Asociación que o fagan sen medo e que aporten tanto ideas novas como colaboración.
A día 1 de Xaneiro temos un saldo positivo de 3.835 €. Ademáis dos ingresos pola cota dos socios a nosa asociación tivo unha subvención do Concello de Muros e outra da Deputación da Coruña. A primeira para cubrir parte das actividades que se fan ao longo do ano e a segunda para o concurso fotográfico.
Entre as actividades do ano pasado destacaron a andaina á Pedra do Cadro, o concurso fotográfico, a representación teatral do grupo “O Xeito”, e as festas do San Xoán e o Magosto.
Tendo en conta que a nova directiva sairá para Xullo, neste tempo seguiremos traballando os que o fixemos durante os últimos catro anos. Como actividade máis proxima temos previsto traer de  novo unha obra de teatro e preparar xogos de verán nas distintas praias da parroquia.

Xa podedes disfrutar tamén do noso boletín A Orola deste pasado inverno, atoparedela pola parroquia e tamén no apartado “Boletín A Orola” desta web.

A.C. Ponte Vella

Asemblea xeral ordinaria A.C. Ponte Vella.

Quedan convocados tódolos socios e socias da Asociación Cultural Ponte Vella para o vindeiro día 5 de Maio, sobre as 20:00 horas, que se celebrará unha Asemblea Xeral Ordinaria. A orde do día será a seguinte: balance anual, estado de contas, convocatoria de eleccións a xunta directiva, presentación de candidaturas e rogos e preguntas.

Unha hora antes, sobre as 7 da tarde faremos entrega do premio ao gañador do Concurso de Fotografía, e tamén inaugararemos a exposición de fotos dos participantes no Concurso.

A.C. Ponte Vella

Sardiñada de San Xoán en Sorribos.

O vindeiro venres día 24, San Xoán, a eso das dez da noite, tódolos que queiran comer unhas sardiñas molladas en pan de balde, só teñen que presentarse  por Sorribos, coma sempre. Teremos tamén música para tomarlle uns tóspiros cas sardiñas. Non faltes porque xa sabes ” no San Xoán xa a sardiña molla o pan”.

A.C. Ponte Vella

Teatro en Sorribos.

Por fin outra noite de teatro en Sorribos. Non faltedes, que o ides a pasar moi ben. O grupo de teatro “O Xeito”, entre os que se atopa o famoso actor Antonio de París, representará a obra  ” A Farsa das zocas” de Ricardo Carballo Calero o vindeiro sábado 18 a eso das dez da noite . Esta obra  vai mostrar ao espectador uns personaxes galegos universais, o crego, o médico, o notario…é un enredo sobre unha herdanza que esperamos que traia un sorriso a todos e todas no público.

A.C. Ponte Vella

Ruta de sendeirismo á “Pedra do Cadro”.

Sábado 28 de Maio de 2011.

Desde a ACR Ponte Vella queremos comezar a potenciar as rutas e carreiros a pé da nosa parroquia, do concello e dos arredores.

SAÍDA: ás 10.30 desde o Alto do Caño (Bar Hórreo)
RUTA: comezaremos a ruta desde o Alto do Caño, seguiremos polo Vilar e polas pistas do monte ata chegar á Pedra do Cadro. Durante o camiño trataremos de que algunha persoa que coñeza ben o lugar nos vaia explicando e guiando polos diferentes lugares (Pedra do Cadro, Laxa Borrateira…)
Unha vez alí realizaremos un descanso para comer, organizar algún xogo e inspeccionar a zona. Posteriormente baixaremos pola mesma ruta.

RECOMENDACIÓNS:
- Apuntarse en Sorribos, na de Carleiras ou no bar Hórreo. Non é obrigatorio
pero sería recomendable para unha mellor organización.
- Levar calzado e roupa cómoda.
- Cada quen debe levar a súa propia comida e bebida.
- Se queredes levar un bo recordo leva a cámara de fotos.

OBSERVACIÓNS:
- Os nenos pequenos deben ir acompañados dun maior responsable.
- Intentaremos levar o coche da asociación de veciños por se acode algún neno pequeno ou persoa maior que non poida facer a pé todo o camiño.
- No caso de que haxa mal tempo a ruta aprazaríase para o sábado 4 de Xuño.
- Se alguén ten algunha dúbida pode chamar ós teléfonos: 648232732 – 665360704.

A.C. Ponte Vella ,

Convocado II Concurso de Fotografía “Ría de Muros e Noia”


Queda convocado o II Concurso de Fotografía Dixital pola A.C.R. Ponte Vella. Entrarán en concurso as fotografías recibidas dende o 1 de Abril de 2011 ata o 15 de Xuño de 2011, ambos inclusive. O concurso referirase a fotografías sobre a Ría de Muros e Noia, con temática libre, pero cun contido propio relacionado coa comarca da ría. Dende aspectos mariñeiros, paisaxísticos, etnográficos, de natureza, históricos, tradicionais, culturais. O gañador recibirá un premio consistente en 200 € en material fotográfico a adquirir en Foto Domi en Muros. Para consultar as bases da convocatoria pincha aquí.

A.C. Ponte Vella

Festa de Entroido Infantil en Sorribos.

O vindeiro sábado 5 de marzo celebraremos as cinco da tarde a festa de entroido cos nenos e cos que xa non son tan nenos, tamén. Pedímosvos que traiades filloas ou orellas para acompañar o chocolate que tomaremos ó remate dos xogos.
Organiza a ACR Ponte Vella e o Concello de Muros.

O evento no facebook.

A.C. Ponte Vella

Entrega de premios do Concurso de Postais de Nadal.

O vindeiro sábado día 18 de Decembro farase a entrega dos dous premios do Concurso de Postais de Nadal onde participaron nenos e nenas de infantil e primaria dos diferentes colexios do Concello. A entrega será no local social de Sorribos sobre as 5 da tarde, a continuación haberá un contaconos e remataremos o acto cunha pequena merendola para os asistentes.

A.C. Ponte Vella ,

¡Cambio de data! 6 Nov.Magosto 2010 na Eira de Bornalle.

O vindeiro sábado día 6 de novembro, como ven sendo habitual nestas datas, celebraremos a eso das dez da noite o tradicional Magosto. A combinación é a de sempre, castañas, viño, queimada, música e un bó ambiente parroquial. Aproveitando que estamos cerca do Samaín, animamos a toda a xente, grandes e pequenos, a que traiades as vosas cabazas decoradas para ambientar o evento. Teremos un premio a cabaza máis bonita e elaborada. Agardamos que non chova e non teñamos que volver a retrasalo máis.

A.C. Ponte Vella

Entrega do premio do I Concurso de Fotografía Ría de Muros e Noia.

O sábado 23 de outubro de 2010, ó redor das 6 da tarde, a A.C. Ponte Vella fará entrega ao gañador do I Concurso de Fotografía Ría de Muros e Noia dun vale de 150 euros para gastar en material fotográfico. O xurado decideu que a foto gañadora fose a titulada “Saíndo da Mureira” de Joaquín Mayo Lestón, de Abelleira. Tódalas fotos participantes no concurso poden verse neste link. Tamén inauguraremos, ese mesmo día, dúas exposicións, unha coas fotos participantes no concurso e outra de manualidades feitas polas mulleres da aldea. As dúas exposicións poderán ser visitadas os días 23 e 24 de outubro en horario de 17 a 20 horas.

A.C. Ponte Vella